عيدكم مبارك

العيد

هذا العيد أنا من الناس اللي تقريبا خلصوا مبجر نسبيا

وبالأحرى مو مهتمين بالتفاصيل كثيرا، المهم شي زاهي وحلو

كنت رايحة الأفنيوز نحجز فلم للعيد واحنا طالعين شفنا هالمنظر

وصورناه ، الزبالة تحت بالمواقف وملابس معلقة يديدة

خوش تخزين وخوش مخزن

.

.

معرض الكتاب

رحت معرض الكتاب ومو في بالي اشتري اي شي

خلصت الصالة الاولى دون اي شيء يذكر من المشتريات

بعدين بالصالة الثانية كان الحدث والموقف الظريف مع الهندي صاحب العربانة وعند دار النشر دايموند

كان الهندي صاحب العربانة يجر العربانة اللي فيها أكياسنا

مشى معانا شوي ودقائق معدودة ثم قال ترى انا الساعة بدينارين

الظاهر كان يمشي عالعداد مثل التكاسي وانا مادري

عطيناه دينار ومشيناه،

بعد فترة شفت يجر عربانة مرأة اخرى ،، كان ودي اقولها عنه بس قلت يمكن نوعها ملسون وتعلمه شغله

اهو ما اكتفى بأغراض المرأة اللي معاه ،، ياني مرة ثانية يبي يعرض علي يشيل الأغراض مع دينارين

يحمد ربه سكتنا عنه

:)

.

.

السفر

من رديت من السفر والمواضيع اللي تشغل البال وتعور القلب قاعدة تصير ورا بعض

أقول لأختي ، ليش المواضيع تصير ورا بعض

ليش المشاكل قاعدة تتحذف من كل صوب

أنا لا أؤمن بأن بعد كل فرح مطلق حزن معتم لكن هذا اللي قاعد يصير

قالت : المشاكل اللي تمرين فيها عادية بالنسبة لغيرج ، لو مريتي بمشاكل نفس غيرج لحسيتي ان مشاكلج لا شيء مقارنة فيهم
هنا سكتت

فعلا لو مريت بنفس المشاكل الكبيرة لكانت مشاكلي هذه لا شيء

الحمدلله على كل حال

.

.

عيدكم مبارك